గమ్యం !!

దారి లేని గమ్యం నా దరి చేరదని
ఎద పొరల్లో దాగిన ఊహల బ్రమరాలని
ఒడసి పట్టి ఒక్క చోట చేర్చితిని.

ఆచరణపు దబ్బనంలో
నేర్పు అనే దారమెక్కించి
ఆశయాల తివాచి అల్లితిని.

అడుగులో అడుగువేస్తూ
ఆ తివాచిపై నడక నేర్చి
ఆ నడకకు కోరికల వడి కలిపి
పరుగులు నేర్పితిని.

నా కోరికల బరువును తాళలేక
కుదేలైన ఆ దారం తివాచిపై
చిరుగుల రాళ్ళను పరిచెను.

అల్లికలో పొరపాటు ఏమోనని వెనుతిరిగిన నేను
నడిచిన దారిన వికసించిన పూలు
కోరికల పరుగున చిరుగుల రాళ్ళు చూసి
కృంగిన మనసు వేదనతో విలపించెను.

ఆ ఆశ్రు ధారలో
నా ఊహల గులాబిలతో చెలిమి చేసిన
కోరికల ముళ్ళు ఒక్కొక్కటిగా రాలి
చిగురుటాకులా ఆశ చిగురించేను.

ఓర్పు అనే గంజితో వడికిన దారంతో
క్షమాపణల అతుకులేస్తూ
గమ్యం వైపు సాగుతున్న
అనుభవపు బాటసారిని
నేనిప్పుడూ.. !!